زمانہ روز جسے یوں ہی سنگسار کرے

زمانہ روز جسے یوں ہی سنگسار کرے

وہ اپنے زخم کہاں تک بھلا شُمار کرے

کوئی بتائے کہاں تک کوئی چمن زادہ

چمن کو اپنا لہو دے کے لالہ زار کرے

وہ جس نے صدیوں بہاروں کے رنگ دیکھے ہوں

خزاں سے اپنے کو وہ کیسے ہمکنار کرے

جو گھر سے نِکلا ہو سچ بولنے کی نیّت سے

قدم قدم پہ وہ اب انتظارِ دار کرے

امیر شہر کے ہاتھوں میں قسمتوں کے چراغ

غریب اپنا کوئی کیسے کاروبار کرے

ہو زخم زخم اگر جس کا لمحۂ اِمروز

وہ کیسے مرہمِ فردا کا انتظار کرے

جو لُٹ گیا ہے فسادوں میں اب اسی کے لیے

یہ حُکم ہے کہ وہ حالات سازگار کرے

اسی کو امن کا اعزاز بھی میسّر ہے

کہ شہر شہر میں پیدا جو اِنتشار کرے

شعور بخش دو ایسا چمن کی کلیوں کو

جو پُھول پُھول کو شائستۂ بہار کرے

غمِ حیات کا منزل شناس کیا ہو گا

وہ آدمی جو رہِ زیست سے فرار کرے

خُودی وہ دولتِ بیدار ہے جو دُنیا میں

گداگری میں بھی انساں کو شہریار کرے

وہی ہے نُورِ بصیرت کا آئینہ فاخر

جو آنکھ آخرِ شب تجھ کو اشکبار کرے

فاخر جلالپوری​