تُو عروج دے کہ زوال دے
فقط اپنی راہ پہ ڈال دے
مجھے چھین لے غمِ دہر سے
فقط اپنے غم کا ملال دے
مِرے خواب آنکھوں سے نوچ لے
کوئی سوچ دے نہ خیال دے
میں جو منزلوں کا حریص ہوں
مجھے راستوں کا وبال دے
مجھے مال و زر کی نہیں طلب
مِرے فن کو اوجِ کمال دے
میری ظلمتوں میں کمی نہ کر
مِرے جگنوؤں کو اجال دے
ہے بہت طویل رہِ وفا
مجھے فرصتِ مہ و سال دے
جو سمجھ سکیں مِرے سامعیں
وہی حرف و صوتِ فعال دے
میرے آئینے کو زباں ملے
میری حیرتوں کو سوال دے
میرے پھیلے ہاتھوں کو خوف ہے
کہ تُو مسکرا کے نہ ٹال دے
اسد معروف
No comments:
Post a Comment