سرِ صحرا قیام کرتے ہیں
تشنگی کو امام کرتے ہیں
میرے ہاتھوں پہ آ کے بیعت کر
جیسے ازلی غلام کرتے ہیں
قرض ہے مجھ پہ احترام ان کا
جو مِرا احترام کرتے ہیں
رکھ رکھاؤ کے ساتھ شام ڈھلے
زخم مجھ سے کلام کرتے ہیں
دستخط خونِ دل سے کروا لے
زندگی تیرے نام کرتے ہیں
صرف تم تو نہیں مِرے دل میں
رفتگاں بھی قیام کرتے ہیں
میں مروّت سمجھنے لگتی ہوں
لوگ رسماً سلام کرتے ہیں
ہجر دوہری اذیتوں کا سفر
ہم ہما صبح و شام کرتے ہیں
ہما شاہ
No comments:
Post a Comment