میری غزلوں کا ہر قافیہ مسترد

 میری غزلوں کا ہر قافیہ مسترد

آپ ہوں سامنے، آئینہ مسترد

شاعری واعری دیکھتا کون ہے

حسن جب تک نہ ہو شاعرہ مسترد

خامشی میری رگ رگ میں گھر کر گئی

شور کرتی ہوئی ہر جگہ مسترد

تو مِرے ساتھ ہو، اور دنیا بھی ہو

اس مثلث کا ہر زاویہ مسترد

زندگی لاکھ قدموں میں پڑتی رہی

کر دیا اس کا ہر فیصلہ مسترد

تجھ پہ میرا یقیں اس قدر بے اٹل

ذہن و دل کا ہر اک وسوسہ مسترد

ہم تِرے غم کی تلخی سے ہیں آشنا

اب نیا کوئی بھی ذائقہ مسترد

ربِ اکبر تِرا فیصلہ دل کشا

جا، نجومی تِرا زائچہ مسترد

ناہید عزمی