دور خوابوں سے محبت سے کنارا کر کے
جیسی گزرے گی گزاریں گے گزارا کر کے
اب تو دعویٰ بھی وہ پہلے سا نہیں ہے ہم کو
کیا کریں عشق مِری جان دوبارا کر کے
کیسی اٹھتی ہے کسک وہ ہی سمجھ سکتا ہے
جس نے دیکھا ہو محبت میں خسارا کر کے
تم سے کچھ اور تعلق تو نہیں اس کے سوا
طعنہ دیتے ہیں مجھے لوگ تمہارا کر کے
جان کا روگ بنے گا وہی لکھ دیتا ہوں
جس کو چاہو گے بہت جان سے پیارا کر کے
تم سمجھتے ہو بھلانے سے کوئی بھولتا ہے
ہم نے دیکھا ہے اے جان یہ چارا کر کے
عامر لیاقت
No comments:
Post a Comment