شفق کا پھول کا خوشبو کا استعارہ تم
جبینِ شب پہ چمکتا ہوا ستارہ تم
چھپائے راز بہت اپنے آپ سے بھی مگر
ہمارے راز سے پھر بھی ہو آشکارا تم
ہوں حادثاتِ زمیں یا کہ گردشِ افلاک
سبھی کے دورِ مصیبت کا استخارہ تم
جبینِ شوق کے سجدے سبھی تمہارے لیے
ہماری زیست کے حاصل کا شہ پارہ تم
زمیں سے عرش تلک جو بھی دیکھتی ہے نظر
نگاہِ چشمِ بصیرت کا ہر نظارہ تم
ہزار رنگ کے پھولوں سے ہے چمن آباد
صدف کے واسطے بس ایک گل ہزارہ تم
صبیحہ صدف
No comments:
Post a Comment