خیر سے دل کو تری یاد سے کچھ کام تو ہے

 خیر سے دل کو تِری یاد سے کچھ کام تو ہے

وصل کی شب نہ سہی ہجر کا ہنگام تو ہے

نُورِ افلاک سے روشن ہو شبِ غم کہ نہ ہو

چاند تاروں سے مِرا نامہ و پیغام تو ہے

کم نہیں اے دلِ بے تاب! متاعِ اُمید

دستِ میخوار میں خالی ہی سہی جام تو ہے

بامِ خورشید سے اُترے کہ نہ اُترے کوئی صبح

خیمۂ شب میں بہت دیر سے کُہرام تو ہے

جو بھی الزام مِرے عشق پہ آیا ہو نعیم

ان سے وابستہ کسی طور مِرا نام تو ہے

حسن نعیم