کر دے جلا کے راکھ مِرے یار پھُونک دے
سانسوں میں آج میری تُو انگار پھونک دے
کرتا ہے روز کیوں یہ تماشا کھڑا نیا
فُرصت سے ایک بار ہی گھر بار پھونک دے
چہرے کی اس کے تم کبھی سُرخی کو دیکھنا
آتش سے گویا کوئی یہ رُخسار پھونک دے
خواہش ہے اِس جہاں میں کوئی تیسرا نہ ہو
دل کا جو بس چلے سبھی کردار پھونک دے
منصف سے کہہ دو روز اُٹھاتا ہے حشر کیوں
یکبارگی وہ سارا ہی بازار پھونک دے
ایسے تو ہاتھ تیرے بھی آنے کا میں نہیں
گردن کو کاٹ پھر مِری دستار پھونک دے
اس طرح اُس نے مجھ کو فراموش کر دیا
مجذوب جیسے آگ میں سنسار پھونک دے
صائم علی
No comments:
Post a Comment