دیارِ عشق میں محشر بپا تھا
کسی کی آنکھ سے آنسو گِرا تھا
لگی تھی آگ سارے پانیوں میں
کلی نے قطرۂ شبنم چُھوا تھا
گِرا طوفاں کے آگے بے بسی سے
ضرورت سے شجر اونچا ہُوا تھا
کہاں اب لوٹ کے آئے گا وہ دن
کسی نے جب مجھے اپنا کہا تھا
رخِ زیبا کے ہونے روبرو سے
خوشی سے جھومتا ہر آئینہ تھا
میں زنداں میں مقیّد تھا و لیکن
خیالِ یار کا روزن کُھلا تھا
جہاں پر لوگ منت مانگتے تھے
وہ میرے دلبراں کا نقشِ پا تھا
میسر تھا نہیں پانی کہیں پر
کہ دریا آنکھ میں اُترا ہوا تھا
اشتیاق احمد یاد
No comments:
Post a Comment