برقِ نگاہِ یار گری آشیاں کے بیچ
بسمل تڑپ کے رہ گیا جلتے مکاں کے بیچ
بلبل! چمن سے دور کہیں آشیاں بنا
صیّاد باغباں ہیں اسی گلستاں کے بیچ
ڈولی نہ پالکی ہے، نہ رقص و سرود ہے
کس کی برات نکلی ہے آہ و فغاں کے بیچ
صحرا میں ایک لمحہ رکے اور چل دیے
میرا سفر قلیل تھا دونوں جہاں کے بیچ
پچھلے پہر کی آہ سے دامن جو ہے سیاہ
شاید گناہ نکلے ہیں اشکِ رواں کے بیچ
ظلمت یہ کس کی تاب سے بے تاب ہو گئی
یہ کون آ گیا ہے زمیں آسماں کے بیچ؟
دل سے تِرا خیال تِرے ساتھ جا چکا
کیا ڈھونڈتے ہو تم یہاں خالی مکاں کے بیچ
اُلجھا ہے کوئی دام، کوئی زلفِ یار میں
ثاقب اُلجھ کے رہ گیا تیر و کماں کے بیچ
اقبال ثاقب
No comments:
Post a Comment