دیکھا ہے جس کسی کو گرفتار عشق ہے

 دیکھا ہے جس کسی کو گرفتارِ عشق ہے

جو بھی ہے اس جہاں میں طلبگارِ عشق ہے

ہر شے کے جیسے دام وہاں پر کھرے ملے

بازارِ عشق ہے وہ تو بازارِ عشق ہے

برسوں کی دوریوں کو یہ جو قربتیں ملیں

کہنے لگے ہیں لوگ کہ یہ کارِ عشق ہے

صحرائے درد میں بھی سکوں پا لیا تو پھر

کیسی سزا ملے جو گنہگارِ عشق ہے

آنکھیں نہ کھل رہی ہیں وہ پلکوں کے بوجھ سے

دل پر ہمارے ایسا کوئی بارِ عشق ہے

یہ کارِ خیرِ عشق ہے اس کے لیے نجات

کیا اور وہ کرے گا جو بیمارِ عشق ہے

ایسے بھی گھر کو آگ لگا دینی چاہئے

کوئی نہ جس جگہ پہ عزادارِ عشق ہے

ظالم کے آگے سر تو ہمارا نہ جھک سکا

اپنی انا کے بیچ میں پندارِ عشق ہے

اطہر کمالِ حسنِ غزل کی ہے جستجو

استاد کے ہنر کا جو معیارِ عشق ہے

یعقوب اطہر