کتنی مشکل سے تقاضا پسِ گفتار کھلا
تب کہیں یہ مِرا پیرایہِ اظہار کھلا
کون وارد ہوا بستی میں کہ سب سوداگر
چھوڑ کے آئے ہیں بازار کا بازار کھلا
اے مِرے دشت نوردو، تھے کہاں پر یارو
جب سرِ دشت کہیں سایہِ اشجار کھلا
مجھ کو دکھ اس کا نہیں کس نے مجھے چھوڑ دیا
دکھ تو یہ ہے مِرا رونا، پسِ دیوار کھلا
جو اذیت تھی چلی آئی ہمارے حق میں
جوں ذرا عشق کا کچھ دائرۂ کار کھلا
جن کی ہجرت سے لپٹ آئے مِرے شہر کی یاد
ایسے لوگوں کے لیے رکھتا ہوں گھر بار کھلا
تب گلے اس کو لگایا تھا سہولت کے لیے
سوز جب کر نہ سکا، میرا عدو، وار کھلا
حمزہ ہاشمی سوز
No comments:
Post a Comment