ہائے اس سرد ٹھٹھرتی ہوئی رت کا فسوں

 امید

ہائے اس سرد ٹھٹھرتی ہوئی رُت کا فسوں

اس پہ پھیلے ہوئے بے کیف نظاروں کا وجود

ہائے اک آتشِ پُر سوز میں سُلگا سا بدن

ہائے یہ دیدۂ خوں بار کا اُجڑا سا وطن

اس پہ اک بند کھڑکی سے آتی ہوئی ماضی کی نوا

اور اک درز سے جھانکتا ہوا اک عہدِ وفا

موتیے کے گجروں سے یہ اُڑتی سی مہک

میرے ہاتھوں کی ہتھیلی سے اُترتا ہوا رنگِ حنا

اس پہ اک شوق کی ارزانی کہ دشتِ طلب میں

ہر آن یہ آواز لگائے؛ تو نظر آ

اس پہ لیکن وہی تکرار

لن ترانی کی صدا

اب ہیں ہر آس سے خالی مِرے قہقہے

یوں کہ فطرت کے ساز سے جوں محروم ہوں جھرنے

ہائے اک بیتی ہوئی اُلفت کا خیال

ہائے اک متروک تمنا کا ملال

لمحہ لمحہ مِرے ہاتھوں سے سرکتے ہوئے لمحے

جسم و جاں کی فصیلوں میں نقب لگاتے ہوئے صدمے

پھر بھی اک مسکان ہے زینت مِرے ہونٹوں کی

ہائے یہ بیتے ہوئے موسم مِری پونجی لے اُڑے

مِرے جوش، ارادے، مِرے سپنے لے گئے

پھر بھی جاری ہے اک حسرتِ ناکام کا بے انت سفر

جانے کس اور لے جائے جنوں بارِ دگر

یہ جو خوش نظمی کی اک چاک قبا

مجھ دل سوختہ نے پہنی ہوئی ہے

زیست بس اک اُمید پہ ٹھہری ہوئی ہے

ماہم حیا صفدر