بہار اب کے بہت پیرہن دریدہ سہی
خزاں کا جشن مناؤ فغاں رسیدہ سہی
رہِ حیات میں ٹھہراؤ موت کے مصداق
قدم بڑھاؤ اگرچہ کہ نا رسیدہ سہی
نیازِ عشق کی نیرنگیاں ارے توبہ
فریب کھاؤ گے پھر بھی فریب دیدہ سہی
اگر چراغ نہ جلتے تو دل جلا ڈالو
کبھی تو معجزۂ چشم آب دیدہ سہی
وفا ہی اپنے مقدر کا بام و در ٹھہری
ہزار بار محبت ستم رسیدہ سہی
خوشا نصیب مخاطب کو خیریت جانو
یہ التفات مسلسل کف رمیدہ سہی
نیا نیا سا ہی لگتا ہے نقش جراحی
ہزار بار تِرا زخم چشم دیدہ سہی
بجز ندامت و رسوائی کچھ نہیں فرحت
تِرا کلام شب مہ رخ دمیدہ سہی
وسیم فرحت علیگ
No comments:
Post a Comment