دل کا ڈھول بجاتا ہوں تو بکتا ہوں

دل کا ڈھول بجاتا ہوں تو بِکتا ہوں

خود کو آگ لگاتا ہوں تو بکتا ہوں

میرے اشک سمندر کا سرمایہ ہیں

ساحل پر جب جاتا ہوں، تو بکتا ہوں

میں وہ پیڑ ہوں، اُگتا ہوں تو کٹتا ہوں

کٹ کر پھر اُگ آتا ہوں، تو بکتا ہوں

ایسی شام کو دنیا والے روتے ہیں

جب میں درد مناتا ہوں، تو بکتا ہوں

روؤں تو پانی پڑنے سے بجھتا ہوں

پھر خود کو سلگاتا ہوں، تو بکتا ہوں

پہلے دیواروں سے دل کی کہتا ہوں

پھر کھڑکی پہ آتا ہوں، تو بکتا ہوں

جب جذبے لکھتا ہوں تو ہنس دیتے ہیں

ہاں جب ناچ دکھاتا ہوں تو بکتا ہوں

ایسے آج بغاوت کی ہے خوابوں نے

جیسے میں سو جاتا ہوں، تو بکتا ہوں

میں تو باقی خاصا سستا گوہر ہوں

جب خود کو چمکاتا ہوں، تو بکتا ہوں

وجاہت باقی