میں مرنے سے گھبراتی ہوں

 تمہیں جی کا حال بتاتی ہوں

میں مرنے سے گھبراتی ہوں

اور یہی وجہ ہے سارا دن

دنیا سے دھیان لگاتی ہوں

کبھی اِس کو پاس بلاتی ہوں

کبھی اُس کو پاس بلاتی ہوں

لوگوں سے جھگڑنے لگتی ہوں

بچوں کو لیے ٹہلاتی ہوں

پرہیز بھی پورا کرتی ہوں

کھانا بھی کم کم کھاتی ہوں

میں مرنے سے گھبراتی ہوں

آئینہ کو اپنی صورت

اٹھتے ہی یاد دلاتی ہوں

ہونٹوں پر رنگ چھڑکتی ہوں

آنکھوں میں دیا جلاتی ہوں

کپڑوں کی چمک کو چھوتی ہوں

زیور کو بدن پہناتی ہوں

خود کر ہر دن زندہ پا کر

میں اک دم خوش ہو جاتی ہوں

میں مرنے سے گھبراتی ہوں

رشتے جو بکھرنے لگتے ہیں

روز ان کو ٹھونک بجاتی ہوں

وعدے جو مکرنے لگتے ہیں

زنجیرِ وفا پہناتی ہوں

دعوے جو اکھڑنے لگتے ہیں

انہیں دستاویز دکھاتی ہوں

اپنے جو بچھڑنے لگتے ہیں

ہر صورت انہیں مناتی ہوں

میں مرنے سے گھبراتی ہوں

مرنا تو بڑی محرومی ہے

یہ بات کسے معلوم نہیں

کوئی ایسا بھی نادان نہیں

کوئی ایسا بھی معصوم نہیں

مرنے والوں کا دنیا میں

اک ماہ بھی چرچا دھوم نہیں

ہے خوب پتہ کیا ہوتا ہے

کوئی لازم علم نجوم نہیں

سب نام مجھے منظور مگر

مرحوم نہیں مرحوم نہیں

یہ سوچ کے جان سے جاتی ہوں

میں مرنے سے گھبراتی ہوں

اسنیٰ بدر