خزاں گزیدہ چمن میں بہار باقی ہے

 خزاں گزیدہ چمن میں بہار باقی ہے

کہ تخمِ گُل پہ مِرا اعتبار باقی ہے

ہر ایک چیز کی باری ہے دَورِ دَوراں میں

جو لوگ جیت گئے، ان کی ہار باقی ہے

شراب ختم ہُوئی ہے، سبُو بھی ٹُوٹے ہیں

رہا تو کُچھ بھی نہیں، کُچھ خُمار باقی ہے

رُتوں کے ساتھ بدلتا ہے جوشِ ہر دریا

گُزر چُکا ہے چڑھاؤ، اُتار باقی ہے

رہی ہے دِل کی لگی، دِل لگی مگر نہ رہی

کہ دِل رہا نہ رہا، دلفگار باقی ہے

نگار خانہ گِرایا گیا، تو گِرنے دو

دِلِ زمانہ میں رُوئے نِگار باقی ہے

مِٹے ہیں رُوئے زمِیں سے تمھارے نقشِ قدم

ضمِیرِ دہر میں اِک یادگار باقی ہے

چلے گئے ہیں اگرچہ جہاں سے وہ، عاؔلم

نفوسِ وقت میں اُن کا شُمار باقی ہے

انتخاب عالم

چانگ شی شوان