غرق کیف شراب ہوتے ہیں

 ساون

غرق کیفِ شراب ہوتے ہیں

پی کے سب پُر شباب ہوتے ہیں

عشق آساں بہت ہے دل والو

اس میں لیکن عذاب ہوتے ہیں

سب حسینوں کو میں نے دیکھ لیا

یہ تو اکثر سراب ہوتے ہیں

اس کی زلفیں ہیں کس قیامت کی

اف یہ کیسے حجاب ہوتے ہیں

زخم دل کے سنبھل کے بخشا کر

یومِ آخر حساب ہوتے ہیں

دوست کب پائیدار ہوتے ہیں

یہ تو اکثر حباب ہوتے ہیں

بے تحاشا نہ چومیے ان کو

ہونٹ برگِ گلاب ہوتے ہیں

چھوڑ جائیں جو بزمِ مے راہی

دل کے خانہ خراب ہوتے ہیں

ریاض راہی