عارفانہ کلام منقبت سلام مرثیہ
بہ فیضِ گردِ صحرا خود کو چمکاتا ہوا آتا
رجَز پڑھتا ہوا،🗡شمشیر لہراتا ہوا آتا
گرانْباری کسی حلقے کی خم رکھتی مِری گردن
کوئی بیڑی کوئی زنجیر چھنکاتا ہوا آتا
ندامت دیر سے آنے کی آنکھوں سے چھلک پڑتی
درورنِ گریۂ بے باک شرماتا ہوا آتا
بہم رکھا نمِ گریہ نے دورانِ سفر ورنہ
میں اس سوکھی ہوئی مٹی کو بکھراتا ہوا آتا
مِری شہ رگ پہ جس خنجر کو حسرت ہے روانی کی
میں اس خنجر پہ گھر سے دھار رکھواتا ہوا آتا
بہ رنگِ خوں فشانی باوضو رہتا سرِ صحرا
بہ شکلِ سجدہ اپنے چھالے دکھلاتا ہوا آتا
مزارِ میثمِ تمّار سے ہونٹوں کو مَس کرتا
زباں کے ساتھ لہجہ بھی بدلواتا ہوا آتا
شہادت استغاثے کی طرح آواز دیتی اور
میں غفلت میں اجل کی راہ پر جاتا ہوا آتا
عارف امام
No comments:
Post a Comment