ہے اب وہ بھی دستِ خریدار میں

 ہے اب وہ بھی دستِ خریدار میں

خدا کی دُکاں بھی ہے بازار میں

زمیں آج وہ مانگنے آئی ہے

جو اُس کی امانت ہے بیمار میں

خزاں کا بھی ایسا نہیں کوئی زور

جو کھو جاؤں پتّوں کے انبار میں

نہ شیطان کو اب کوئی ضد نہیں

نہ اب حوصلہ ہے گنہ گار میں

فقط ناتوانی کا ہے اعتراف

یہ نرمی جو آئی ہے گُفتار میں

اسی کے اشارے کو دی ہے زباں

وہی ہے پسِ پردہ انکار میں

غرض یہ کہ ایمان سے بھی گئے

سمجھدار لوگوں کی تکرار میں

شارق کیفی