خرمن ہستی پہ پھر بارش رحمت کر دے

 خرمنِ ہستی پہ پھر بارشِ رحمت کر دے

دل شکستہ ہے مِرا آج سلامت کر دے

ہم پہ ٹوٹا ہے یہاں کوہِ الم اے مولا

اہم ہیں مظلوم کہ اب تھوڑی حمایت کر دے

مجھ سے معصوموں کی لاشیں نہیں دیکھی جاتیں

میری آنکھوں سے تو کافور بصارت کر دے

کیسے اب دفن کروں لاشوں کے انباروں کو

اب تو بہتر ہے کہ نازل تو قیامت کر دے

ساری دنیا ہی تلی بیٹھی مٹانے پہ ہمیں

بے سہارا ہیں کہ اب نظر عنایت کر دے

اپنے ماں باپ کے سایہ سے جو محروم ہیں یاں

ان یتیموں کی یتیمی پہ بھی شفقت کر دے

آج دریا میں لہو بہتا ہے پانی کی جگہ

آج دشمن پہ بھی کچھ تھوڑی ملامت کر دے

ہم نے کشکول اٹھایا ہے اماں کی خاطر

نامرادوں کی بھی اب پوری تو حاجت کر دے

ثمریاب ثمر

ثمر سہارنپوری