عارفانہ کلام حمد نعت منقبت
مُصحفِ منزلِ یٰسینِ مُبیں ہیں سجادؑ
خِضَرِ وادئ عرفان و یقیں ہیں سجادؑ
خاتمِ صبر و تحمّل کے نگیں ہیں سجادؑ
چار معصوموں کے سجادہ نشیں ہیں سجادؑ
خلق میں جیسے علیؑ ہیں شۂ لولاک کے بعد
ہو بہو ایسے ہیں یہ پنجتنِ پاک کے بعد
فلکِ صبر و تحمّل کے یہ ہیں ماہِ تمام
حلم میں آئینۂ علمِ رسولِ اسلام
اک تو ہمنامِ علیؑ، دوسرے حق کے ہمنام
تیسرے عترتِ محبوبِ خدا، چوتھے امام
جن کے نانا ہیں محمّدؐ، یہ ولی ایسے ہیں
جن کا بیٹا بھی محمّدؑ، یہ علیؑ ایسے ہیں
وارثِ احمدِؐ مختار، امیرِ کونین
کوکبِ اوجِ وفا، ماہِ شۂ بدر و حنین
سورۂ صاد بھی دیکھا کرے وہ نورالعین
حَسنِؑ پاک کے داماد، علیؑ ابنِ حُسینؑ
ثانئ حیدرِؑ کرّار ہیں، احمدؐ کی قسم
یہ علیؑ چوتھے خلیفہ ہیں محمّدؐ کی قسم
اے زہے منزلتِ نورِ نگاہِ شبّیر
معنئ حلم کی گویا ہے سراپا تصویر
یوں ہوئے شام میں یہ طوق پہن کر تشہیر
بن گئی کشتئ اسلام کا لنگر زنجیر
یہ جو خاموش رہے موذیوں کا دم نکلا
ان کی زنجیر سے زنجیر کا ماتم نکلا
نسیم امروہوی
No comments:
Post a Comment