دے گیا ہے مجھے اک مرد قلندر یہ پیام

 دے گیا ہے مجھے اک مردِ قلندر یہ پیام

مردِ مومن ہے تو اندیشۂ باطل ہے حرام

تُو ہے خود عاصئ افکار کا اپنے نخچیر

ہے عبث شکوۂ بے مہری وجورِ ایام

کبھی آفاق میں گم ہے کبھی اوہام میں گم

وائے بے ربطی کہ برہم ہے تِرا سارا نظام

پیروِ مسلکِ اربابِ نظر ہو کے تو دیکھ

مہر تاباں، مہ و انجم ہیں سبھی تیرے غلام

تُو ہے وہ مردِ مجاہد کہ نظر بھی تیری

خنجر و تیر و سناں نیزہ و شمشیر و حسام

بن کے محتاج نہ کر اپنی خودی کو رُسوا

کر سحر اپنی سحر شام کو کر اپنی شام

اس جہاں کو نہ سمجھ لے تو نشیمن اپنا

درحقیقت ہے کہیں اس سے سوا تیرا مقام

حق سے غافل ہے تُو ہر سانس گُنہگار تِری

دُھن میں اس کی ہے اگر زیست عبادت ہے تمام

چشم بینا ہے تو ہر نخلِ شجر شعلۂ طور

دل ہے بیدار تو ہر تارِ نفس اک الہام

دردِ دل آر بدستے کہ بجز سوزِ دروں

ہمہ بے معنی و بے روح چہ سجدہ چہ قیام

مذہبِ فقر ہو یا شرعِ محبت اس میں

عیشِ منزل بھی غلط عشرتِ ساحل بھی حرام

جس کی محمود حکومت ہو دلوں پر سب کے

فتح اُس کی ہے، وہی سارے زمانے کا امام

سید ابوالفضل محمود قادری