محبت ہے وہ قلزم جس کی طغیانی نہیں جاتی
کٹی اک عمر لیکن دل کی ویرانی نہیں جاتی
بڑی مدت سے زنجیرِ فرنگی کٹ گئی لیکن
مگر ذہنوں سے اب تک اُن کی نگرانی نہیں جاتی
جو سر سجدے میں کٹے جائے محبت کے تقاضے پر
جہانِ عشق میں ضائع وہ قربانی نہیں جاتی
خزاں کا زرد پتہ بن گیا میرا بدن ایسا
مِری تصویر بھی اب مجھ سے پہچانی نہیں جاتی
معطر ہوکے نکلے جو یقین و حق کے قلزم سے
کسی ظالم کو سجدے میں وہ پیشانی نہیں جاتی
مِرے اللہ نے جو تحفتاً مجھ کو عنایت کی
مِرے آنگن سے غربت کی وہ سلطانی نہیں جاتی
اسے کچھ اس قدر مجھ سے عقیدت ہے کہ مت پوچھو
ہمارے دل کے در سے گل پریشانی نہیں جاتی
گل بخشالوی
No comments:
Post a Comment