ترے جانے کا اتنا غم ہوا ہے

 تِرے جانے کا اتنا غم ہوا ہے

بیاباں اشکِ خون سے نم ہوا ہے

مِری ہر سانس میں خُوشبو ہے اس کی

مِرے اندر وہ ایسے ضم ہوا ہے

محبت حد سے بڑھتی جا رہی ہے

بس آنا جانا تھوڑا کم ہوا ہے

جھلک دیکھی تِرے رُخسار کی جب

بیاباں گُلستاں اس دم ہوا ہے

دلوں کی دھڑکنیں برہم ہیں ہم سے

کوئی ہم سے ذرا برہم ہوا ہے

کِیا ہے صاف جب سے دل کا شیشہ

نگاہوں کا عجب عالم ہوا ہے

کسی کی یاد کی شبنم سے فرخ

مِری سوچوں کا سورج نم ہوا ہے

فرخ محمود