میں تم سے محبت کرتا ہوں

 تم یہاں ہو

اور کہیں مت جاؤ

تم میری آخری سِسکی تک ٹھہرو

اور مجھ سے کسی خوفزدہ شخص کی طرح لِپٹ جاؤ

کہ کبھی ایک اجنبی سایہ تمہاری آنکھوں سے گُزرا تھا

اب بھی ہاں ابھی بھی تم میرے لیے شہد آشام بنتی ہو

تمہارے پُستانوں میں اس کی خُوشبو رچی ہے

جس لمحے اُداس ہوا تتلیوں کا قتل کرتے گُزرتی ہے

میں تم سے محبت کرتا ہوں

میری مسرت تمہارے ہونٹوں کے میٹھے پھل چکھتی ہے

تم نے کس قدر میری عادی ہو جانے کا دکھ سہا ہو گا

میری وحشی تنہا رُوح

میرا نام جسے سب چھوڑ جاتے ہیں

کئی بار ہم نے صبح کے بُجھتے ستارے کو

ہماری آنکھیں چھومتے دیکھا

ہمارے سروں پر مٹیالی روشنی کو ہوا میں ڈھلتے دیکھا

میرے الفاظ تم پر بارش بن کر برسے

طویل عرصے تک میں نے تمہارے بدن کے چمکتے سیپ سے محبت کی

میں اکثر سوچتا ہوں

تم میری ساری کائنات ہو

میں تمہارے لیے پہاڑوں سے مُسکراتے پُھول

نیلے سوسن، گہری دُھند

اور بوسوں سے بھری ٹوکریاں لاؤں گا

میں تمہارے ساتھ وہ کرنا چاہتا ہوں

جو بہار چیری کے سفید درختوں سے کرتی ہے

شاعری؛ پابلو نرودا

اردو ترجمہ؛ زاہد امروز