اس نے دیکھا نہیں مڑ کے جاتے ہوئے

 اس نے دیکھا نہیں مُڑ کے جاتے ہوئے

مدتیں ہو گئیں دل جلاتے ہوئے

جانے کیوں چل دیا اس طرح رُوٹھ کر

میں نے چاہا تھا جس کو کبھی ٹُوٹ کر

خواب ٹُوٹا وہ ہی ہاتھ سے چُھوٹ کر

وہ تو لے ہی گیا دل مِرا لُوٹ کر

عشق کے ضابطہ کو نبھاتے ہوئے

اس نے دیکھا نہیں مُڑ کے جاتے ہوئے

دور تک ہے اندھیرا مِری راہ میں

دل تڑپتا ہے اب بھی تِری چاہ میں

وہ مِلے گا کہیں تو کسی گاہ میں

درد ہوتا بیاں ہے مِری آہ میں

لوگ ہیں پُوچھتے آتے جاتے ہوئے

اس نے دیکھا نہیں مُڑ کے جاتے ہوئے

مُشکلوں سے بھرا ہے یہ میرا سفر

چاہے جاؤ جدھر، وہ ہی آئے نظر

آج پھر سے میں آیا ہوں اس کے نگر

شاعری کا جو دے کر گیا تھا ہُنر

جگنوؤں کی طرح جگمگاتے ہوئے

اس نے دیکھا نہیں مُڑ کے جاتے ہوئے

یہ تصوّر تِرا اور تنہائیاں

ساتھ میرے چلی تیری پرچھائیاں

تیری باتوں میں لگتی تھی سچائیاں

یاد آتی رہیں تیری نادانیاں

اس کی یادوں سے دل کو سجاتے ہوئے

اس نے دیکھا نہیں مُڑ کے جاتے ہوئے

آرزو ہے مِری وہ مِرے ساتھ ہو

ہے تمنّا یہی بس ملاقات ہو

پھر ستاروں کے جُھرمٹ کی اک رات ہو

اور ہاتھوں میں بس اک تیرا ہاتھ ہو

پاس آ جائیے مُسکراتے ہوئے

اس نے دیکھا نہیں مُڑ کے جاتے ہوئے

زندگی سے تِری میں چلا جاؤں گا

پُوچھتے ہیں وہ مجھ سے کہاں جاؤں گا

اپنا وعدہ وفا میں نبھا جاؤں گا

تیری راہوں میں دل کو جلا جاؤں گا

میرے سارے خطوں کو جلاتے ہوئے

اس نے دیکھا نہیں مُڑ کے جاتے ہوئے

عشق میں تجھ کو کوئی تو حاصل ملے

یہ دُعا ہے مِری تجھ کو منزل ملے

گر ملے تجھ کو کوئی تو مہمل ملے

تیرے جیسا تجھے کوئی سنگدل ملے

میری راتوں کی نیندیں چُراتے ہوئے

اس نے دیکھا نہیں مُڑ کے جاتے ہوئے

میرے دل اب تو اس کی لگن چھوڑ دے

یہ شہر بھی ہے اس کا چمن چھوڑ دے

اس کی یادوں کی دل سے جلن چھوڑ دے

محفلیں بھی تو اس کا جشن چھوڑ دے

جا رہا ہوں میں عابد بتاتے ہوئے

اس نے دیکھا نہیں مُڑ کے جاتے ہوئے

عابد نواب سہارنپوری