عشق جھیلا ہے تو چہرہ زرد ہونا چاہئے

 عشق جھیلا ہے تو چہرہ زرد ہونا چاہیے

حُسن کے شیدائیوں کو مرد ہونا چاہیے

بد گُمانی پونچھ کر آنچل سے کوئی چوم لے

اس لیے تصویر پر کچھ گرد ہونا چاہیے

سچ کہو تو ہر کہانی داستان اپنی ہی ہے

آدمی کے دل میں تھوڑا درد ہونا چاہیے

آج کے بوسوں میں سچائی کی سُرخی ہے کہاں

اے مصور! ان لبوں کو زرد ہونا چاہیے

اس مکاں میں رہنے والے مُردہ دل انسان ہیں

اس محل کے پتھروں کو سرد ہونا چاہیے

ایک جیسے چہرے مہرے ایک جیسی نیتیں

بھیڑ میں سب سے الگ اک فرد ہونا چاہیے

ماں کا آنچل تھام کر رونا بہت آسان ہے

دور رہ کر رونے والا مرد ہونا چاہیے

ف س اعجاز

فیروز سلطان اعجاز