عارفانہ کلام حمد نعت منقبت
ہاتھ خالی شہِ کوثرؐ نہیں جانے دیتے
بندۂ در کو وہ در در نہیں جانے دیتے
حیطۂ خیر میں رکھتے ہیں سدا خیرِ بشرؐ
جانبِ شر ہمیں یکسر نہیں جانے دیتے
لطف ایسے بھی وہ فرماتے ہیں مہجوروں پر
صدمۂ ہجر سے باہر نہیں جانے دیتے
سر کٹا لیتے ہیں عشاق مگر سینے سے
دولتِ عشقِ پیمبرﷺ نہیں جانے دیتے
تنگدستی میں بھی دامانِ غِنا ہاتھوں سے
آپ کے مست قلندر نہیں جانے دیتے
آپ کی مدح سرائی کے مواقع یوں ہی
خدمتِ نعت کے خوگر نہیں جانے دیتے
وقت ایسا بھی کبھی زیست میں آتا رضوی
وہ ہمیں پاس بلا کر نہیں جانے دیتے
نورالہدیٰ رضوی
No comments:
Post a Comment