عارفانہ کلام حمد نعت منقبت
میری تقدیر کا حصہ بھی عطا کر اللہ
اپنے محبوبؐ کا صدقہ بھی عطا کر اللہ
مجھ کو فاقوں میں توکل کی عطا کر نعمت
استقامت کا سلیقہ بھی عطا کر اللہ
منجمد ہوتے ہوئے زیست کے ہونٹوں کو اب
تیری توحید کا نغمہ بھی عطا کر اللہ
ساتھ ہی دین کی خدمت کے تُو دل کو میرے
خدمتِ خلق کا جذبہ بھی عطا کر اللہ
میری آنکھوں کو دے کعبہ کی زیارت کا شرف
اور دیدارِ مدینہ بھی عطا کر اللہ
خاتمہ خیر پہ ہو، ہے یہ تمنائے خمار
آخری وقت میں کلمہ بھی عطا کر اللہ
ریاض احمد خمار
No comments:
Post a Comment