خدا ناراض ہے شاید چلو رب کو منا لیں اب

 خدا ناراض ہے شاید

ابھی تو جھُوٹ بکتا ہے بازاروں میں اداروں میں 

سفارش اور رشوت ہے تو ہو گا کام اشاروں میں

ابھی تو سو روپے کی چیز بکتی ہے ہزاروں میں

جہاں پر لونڈے بازی ہے مدرسوں اور مزاروں میں

کبھی ہیجڑوں کو ہم جلتی ہوئی سگرٹ لگاتے ہیں

کبھی عورت کو راہ چلتے ہوئے رنڈی بُلاتے ہیں

کبھی ہم بے زبانوں کو ستاتے ہیں، رُلاتے ہیں

کبھی سڑکوں پہ چلّاتے ہوئے عہدے بتاتے ہیں

گِرا کر کوٹھڑی مسکین کی کوٹھی بناتے ہیں

نفع نقصان کی گِنتی ہے اور رب کو مناتے ہیں

ابھی بے پردگی اور بے حیائی کے گُناہ باقی

ابھی معصوم بچوں سے درندوں کے زنا باقی

بقاء کی جنگ لڑتا ہے کوئی ہے محوِ عیاشی

ڈرو اس وقت سے جس دن رہ جائے گی فنا باقی

جہاں پر عالمِ دیں معافی مانگیں خود کمینوں سے

جنہوں نے دی نہیں اُجرت غریبوں کو مہینوں سے

ذرا تم امن کی پٹی ہٹا کر سرحدوں کے پار دیکھو تو

تمہیں فوجیں نظر آئیں جو برسوں سے مسلّط ہیں

تمہیں معلوم ہے؟

جب بے گناہ کا خون گرتا ہے تو اوپر عرش ہلتا ہے

در و دیوار، نہ بازار نہ اسکول نہ بستہ

جو بچہ ماں کو دفنائے وہ بچہ پھر نہیں ہنستا

ابھی بھی ڈر نہیں لگتا؟

یہ قبرستان تم کو اپنا گھر نہیں لگتا

فقط اک حادثہ ہو گا، وبا آئے گی یا کوئی

خدا ہم کو دکھا دے گا؛ 

کہ تو بس اک بھُربھری مٹی سے زیادہ کچھ نہیں انساں

تیری اوقات بھی کیا ہے 

یہ دنیا کے جھمیلے ان میں جیت اور مات بھی کیا ہے

بالآخر لوٹ جانا ہے

اے دھرتی کے خدا، دھرتی تلے کیڑوں نے کھانا ہے

چلو رب کو منا لیں اب

گریں سجدے میں، معافی مانگ لیں آنسو بہا لیں ہم

ہے کوئی مصلحت پوشیدہ کوئی راز ہے شاید

خدا ناراض ہے شاید

محسن عباس حیدر