تم ملے تھے کہ نہیں رات یہ شک باقی ہے

 تم ملے تھے کہ نہیں رات یہ شک باقی ہے

جسم ہے چُور مگر دل میں چپک باقی ہے

سو گئیں جاگتے لمحوں کی نشیلی آنکھیں

بسترِ شب کی نگاہوں میں چمک باقی ہے

آج کی رات نہ پھر لوٹ کے آئے شاید

آج کی رات بھی کیوں دل میں کسک باقی ہے

میری رگ رگ میں تو ہے تیرے بدن کی خوشبو

تیری ہر سانس میں دُوئی کی مہک باقی ہے

یوں تو دو روحوں کی تکمیل بھی ہو سکتی ہے

زیب آغوش مگر تجھ میں جھجک باقی ہے

تلخئ ہجر کے آلام تو بھولے شاہد

لذتِ وصل کی یاد آج تلک باقی ہے

شاہد شیدائی