اے خیال یار تو دل میں جو مہماں ہو گیا

 اے خیالِ یار تُو دل میں جو مہماں ہو گیا

پھر دلِ ویران مِرا، رشکِ گُلستاں ہو گیا

تھی مِرے دل کی اُمنگوں ہی سے دنیا کی بہار

دل پریشاں کیا ہوا، عالم پریشاں ہو گیا

دم محبت کا بھرا کرتا تھا جو دل وصل کی

اب وہ شامِ ہجر آتے ہی پشیماں ہو گیا

وائے ناکامی، مِری دنیا سراپا یاس ہے

زندگی کا ہر ورق خوابِ پریشاں ہو گیا

فصلِ گُل آتے ہی کتنی بڑھ گئی شانِ جنون

چاکِ دامن بڑھ کے پھر چاکِ گریباں ہو گیا

ان کے خال و رُخ کے اے فاضل تُو نیرنگی نہ پوچھ

کوئی ہندو بن گیا،۔ کوئی مسلماں ہو گیا

فاضل کاشمیری