آرزو کب کوئی محتاج بیاں ہوتی ہے

 آرزو کب کوئی محتاج بیاں ہوتی ہے

خامشی خود ہی محبت کی زباں ہوتی ہے

راحت و عیش میں یہ بات کہاں ہوتی ہے

زندگی درد میں ڈوبے تو جواں ہوتی ہے

طالب عشق و محبت ہیں نہ پوچھو ہم سے

شب کہاں صبح کہاں شام کہاں ہوتی ہے

جس نشیمن کی ہو تعمیر میں خون مظلوم

اس کی نگراں نظر برق تپاں ہوتی ہے

تُو نے دیکھی ہو تو کچھ تجھ سے کہوں اے ناصح

کیف زا کیا نگہ پیر مغاں ہوتی ہے

بے سبب تو نہ سمجھ ناصح ناداں اس کو

ٹیس سی اک جو قریب رگ جاں ہوتی ہے

اہل دل اہل نظر سے کوئی پوچھے زمزم

اس محبت کو جو سینہ میں نہاں ہوتی ہے

صوفی محمد ایوب زمزم