آفاق دل میں طلعتِ فن اور بڑھ گئی

 عارفانہ کلام حمد نعت منقبت

آفاقِ دل میں طلعتِ فن اور بڑھ گئی

نعتِ نبیؐ سے تابِ سخن اور بڑھ گئی

خیرات لیے کے آئی صبا اُن کے باغ سے

رنگینئ جمالِ چمن اور بڑھ گئی

بزمِ ثنائے زلف میں جب سے ہوئی شریک

دنیا میں قدرِ مُشکِ ختن اور بڑھ گئی

دندانِ شہ کی نغمہ سرائی کا فیض ہے

پہلے سے تابِ دُرِ عدن اور بڑھ گئی

اُن کے لبوں کا وصف سنا تھا کہ بہرِ دید

حسرت، درونِ لعلِ یمن اور بڑھ گئی

ان کا عرق لگا کے وہ مہکی تھی مثلِ گل

بلکہ گلاب و گل سے دلہن اور بڑھ گئی

میلادِ شہﷺ پہ شمس نے پایا لباسِ نور

طلعت میں شمعِ چرخِ کہن اور بڑھ گئی

رکھا قدم انہوں نے سرِ اوج پر ترے

رفعت تِری اے نیل گگن! اور بڑھ گئی

اقدامِ حق سےجبۂ باطل پہ تھی شکن

ہجرت ہوئی تو ایک شکن اور بڑھ گئی

وہ جلوہ گر تھے خواہشِ دیدار کم نہ تھی

پردہ کیا تو سب کی لگن اور بڑھ گئی

یادِ گلِ وصال نے بے تاب کر دیا

جو خارِ ہجرکی تھی چبھن اور بڑھ گئی

سیفی! یہ مدحتِ شہِ خوباںؐ کا نور ہے

چمکی عروسِ فکر، کرن اور بڑھ گئی

شاکر حسین سیفی