یہ نار محبت کہیں تجھ کو نہ جلا دے

 یہ نارِ محبت کہیں تجھ کو نہ جلا دے

یادوں کی دبی راکھ کو ہرگز نا ہوا دے

لازم نہیں ہر بار تجھے ہم ہوں میسر

ممکن ہے تو اس بار ہمیں سچ میں گنوا دے

کب تک تِری یادوں کی اذیت کو سہوں میں

اس کرب سے مجھ کو کوئی آزاد کرا دے

جینے نہیں دیتا یہی احساس شب و روز

سالوں کی رفاقت کوئی لمحوں میں بھلا دے

قائم ہی رہیں گے سدا ہم اپنی وفا پر

تو ظلم کی شدت کو بھلے اور بڑھا دے

یہ سوچ کے دل تجھ کو نہیں بھولا ابھی تک

شاید کہ کسی موڑ پہ تو ہم کو صدا دے

وہ شخص بھلا کیسے سکوں پائے کہ جس کی

صدیوں کی ریاضت کوئی مٹی میں ملا دے

اس دور میں ممکن نہیں حق بات بھی کہنا

مجرم ہوں اگر میں مجھے سولی پہ چڑھا دے

دنیا تِرے اخلاص کو سمجھے گی نہ عاصی

بہتر ہے کہ جذبوں کو تہہ خاک سلا دے

عاصمہ فراز سلہری