تصور میں مرے کعبہ نہ اب بتخانہ آتا ہے
نظر ہر سمت مجھ کو جلوۂ جانانہ آتا ہے
ہوا ہوں ایسا بے خود اک بت کافر کی الفت میں
کہ کعبہ میں بھی اب مجھ کو نظر بت خانہ آتا ہے
حقیقت میں نمود حسن ہی ہے عشق کا باعث
نمائش حسن کی ہوتی ہے جب پروانہ آتا ہے
یہ دنیائے محبت بھی الٰہی کیسی بستی ہے
جو آتا ہے یہاں وہ ہوش سے بیگانہ آتا ہے
گریباں چاک دامن پرزہ پرزہ خاک آلودہ
نئی سج دھج نرالی شان سے دیوانہ آتا ہے
شب غم موت آتی ہے نہ وہ آتے ہیں اے فاضل
لبوں پر دم نکل جانے کو بیتابانہ آتا ہے
فاضل کشمیری
No comments:
Post a Comment