کیا عجب شخص ہے وہ، خندۂ بسمل والا

 کیا عجب شخص ہے وہ، خندۂ بسمل والا

بے دلی میں بھی بہر گام لگے دل والا

کوئی ہوتا ہے مِرے عالمِ محبوسی میں

نشۂ باد چُرا لاتا ہے ساحل والا

دیکھ تا دیر نہ رکھ چاک نگاہی اپنی

بند گلیوں کے اندھیروں سے کہیں سِلوا لا

منزلوں والے تو گمراہ سمجھتے ہیں مجھے

رہرواں مجھ کو سمجھتے رہیں منزل والا

کچھ تو رکھ اپنی دلآزار طبیعت کا بھرم

ایستادہ ہے تِرے سامنے اک دل والا

ایک مُشکل تو بہرحال مجھے رہنی ہے

راستہ دیکھ کے آیا ہے وہ مُشکل والا

رائیگاں جاتی رہی میری تلاشِ بسیار

پھر نہیں مل سکا جلوہ، تِری محفل والا

حامد عزیز