بے وفا ہے با وفا ہے فیصلہ ہوتا نہیں
اس سے مل کر بھی حقیقت کا پتا ہوتا نہیں
جب چمکتی شاہراہیں سامنے موجود ہوں
مجھ سے پھر پگڈنڈیوں پر اکتفا ہوتا نہیں
درد کے رشتوں کی اپنی اک الگ ہے داستاں
فاصلہ ہوتا ہے پھر بھی فاصلہ ہوتا نہیں
پیشہ ور لوگوں سے کیا لیں زندگی پر تبصرہ
نیند اور خوابوں سے ان کا واسطہ ہوتا نہیں
گہما گہمی زندگی کی اف یہ رفتار جہاں
بیتے لمحوں کو دوبارہ سوچنا ہوتا نہیں
ماجد علی کاوش
No comments:
Post a Comment