تھی کوئی تمثیل گل شاخ گماں سے بے خبر

 تھی کوئی تمثیل گُل شاخِ گُماں سے بے خبر

عکس تھا ٹھہرا ہوا آبِ رواں سے بے خبر

جانے کیسی دُھن میں تھے ہم، بے خطر چلتے رہے  

غلغلۂ شہر غوغائے سگاں سے بے خبر 

غم سے بھر آئے اگر  تو خُود سے ٹکراتا ہے دل 

ٹُوٹتا ہے یہ سبو شیشہ گراں سے بے خبر

گُھل رہا ہے بوسۂ لب گرمئ آغوش میں 

ایک موسم سا بنا ہے جسم و جاں سے بے خبر

کھو گئے نہیں سُنتے سُنتے جانے ہم کس موڑ پر

داستاں گو بھی ہوا ہے داستاں سے بے خبر

آرزو کا ہی مقدر تھا شکستِ آرزو

رائیگانی میں رہے ہم رائیگاں سے بے خبر

جانے یہ کیسی جگہ ہے جانے ہے کیسا مقام  

ہم مکیں جس کے ہوئے ہیں لامکاں سے بے خبر

دل کی ہر دھڑکن ہے جیسے موت کی آہٹ مگر

چل پڑے ہیں ہم صدائے ناگہاں سے بے خبر

کھینچتی جاتی ہے ہم کو ایک زنجیر سفر

بے خبرمنزل سے قدموں کے نشاں سے بے خبر

گردشِ چاکِ تمنا اور وہی اک مُشت خاک 

ہم زمیں زادے تھے رسمِ آسماں سے بے خبر

مرھمِ دستِ شفا سے مُندمل ہر زخم تھا 

تھی مسیحائی مگر زخم نہاں سے بے خبر

زندگی تھی روزو شب کے درمیاں کوئی تھکن 

ہم پھرے آوارہ اس بارِ گراں سے بے خبر

رات سرمد سے رہے کچھ دیر ہم بھی ہمکلام

ایک استغراق تھا شورِ  بیاں سے بے خبر

سرمد صہبائی