شہرہ کاکل و رخسار وہی ہے کہ جو تھا

شہرۂ کاکل و رخسار وہی ہے کہ جو تھا

دل حریفِ نگہِ یار وہی ہے کہ جو تھا

شہ نشینوں سے ہوس جھانکتی بیٹھی ہے ابھی

عشق رسوا سرِ بازار وہی ہے کہ جو تھا

روز اک دامنِ نو کوئی کہاں سے لائے

شیوۂ دیدۂ خونبار وہی ہے کہ جو تھا

کوئی بتلاؤ، کہ ایمان کسے کہتے ہیں

نعرۂ کفر سرِ دار وہی ہے کہ جو تھا

زندگانی تِری مانند حسیں ہے کہ جو تھی

زندگانی سے مجھے پیار وہی ہے کہ جو تھا

سلیمان اریب