خاک اڑتی ہے چار سو اے دوست

خاک اڑتی ہے چار سُو اے دوست

جانے کس دشت میں ہے تو اے دوست

پھر وہی میں گزیدۂ محفل

پھر وہی تیری آرزو اے دوست

مجھ سے سلجھی نہیں ہے زلفِ خیال

ذہن الجھتا ہے مو بہ مو اے دوست

نکتہ بیں، نکتہ آفریں ہے کون

کیجیۓ کس سے گفتگو اے دوست

تو نہیں ہے تو زہر لگتی ہے

میکدے کی یہ ہاؤ ہو اے دوست

کتنے احباب ہیں سرِ مجلس

پر کسی میں وہ خُو نہ بُو اے دوست

میں بھرے مۓ کدے میں تنہا ہوں

کون تنہا کا ہم سبو اے دوست

ہر کسی کی زبان شعلہ فشاں

ہر کسی کا مزاج لُو اے دوست

کچھ میں کچھ کچھ تری شباہت ہے

کون ہے تجھ سا ہو بہو اے دوست

جل اٹھا ہے چراغِ بوسہ پھر

روشنی سی ہے چار سُو اے دوست

نہیں ملنا تو یاد بھی نہیں آ

تارِ احساس بھی نہ چھو اے دوست

گھومتا ہوں کسی بگولے سا

جانے کس کی ہے جستجو اے دوست

وہ تعلق بھی دھوپ چھاؤں سا

کتنا مبہم تھا اے عدو، اے دوست

یوں تو اک بار جو بچھڑ جائے

کب ملا ہے مگر کبھو، اے دوست

آج ہے کس کی آبرو اے دوست

شہر کا شہر تند خو اے دوست

کچھ ہیولے ہیں ہر طرف رقصاں

کوئی غوغا ہے کو بکو اے دوست

ہر کوئ زیرِ سایۂ شمشیر

ہر کوئ طوق در گلو اے دوست

شہرِ دامان و دل دریدہ ہے

ہر کوئ ہے لہو لہو اے دوست

آ، کہ روشن کریں چراغِ سبو

شام بھی ہے لہو لہو اے دوست

اختر عثمان