پائی نہ تیرے لطف کی حد سید الوریٰ

ہدیۂ نعت بحضور سرور کائناتﷺ

پائی نہ تیرے لطف کی حد سید الوریٰﷺ​

تجھ پر فدا مِرے اب و جد سید الوریٰﷺ​

تیری ثنا ورائے نگاہ و خیال ہے​

فخرِ رسل، حبیبِ صمد، سید الوریٰﷺ​

تو مہر لازوال،۔ سرِ مطلعِ ازل​

تو طاقِ جاں میں شمعِ ابد سید الوریٰﷺ​

عرفان و علم، فہم و ذکا تیرے خانہ زاد​

اےجانِ عشق، روحِ خرد، سید الوریٰﷺ​

تو اک اٹل ثبوت خدا کے وجود کا​

تو ہر دلیلِ کفر کا رد، سید الوریٰﷺ​

اہلِ جہاں کو ایسی نظر ہی نہیں ملی​

دیکھے جو تیرا سایۂ قد سید الوریٰﷺ​

گزرے جو اس طرف سے وہ گرویدہ ہو ترا​

یوں عنبریں ہو میری لحد سید الوریٰﷺ​

درکار مرگ و زیست کے ہر موڑ پر مجھے​

تیری پناہ، تیری مدد، سید الوریٰﷺ​

تائؔب کی یہ دعا ہے کہ اس کی بیاضِ نعت​

بن جائے مغفرت کی سند سید الوریٰﷺ​

حفیظ تائب