ہم اجل کے آنے پر بھی ترا انتظار کرتے

ہم اجل کے آنے پر بھی ترا انتظار کرتے

کوئی وعدہ سچ جو ہوتا تو کچھ اعتبار کرتے

جو نہ صبر اور دم بھر ترے بے قرار کرتے

ابھی برق کا طریقہ فلک اختیار کرتے

اگر اتنی بات سنتے کہ ہے عشق میں مصیبت

کبھی ہم نہ تیری خاطر دل بے قرار کرتے

دل زار بے خبر تھا کیا قتل تو مزا کیا

یہ سپہ گری ہے پہلے اسے ہوشیار  کرتے

ہمیں جان دے کے مارا ہمیں دے کے دل مٹایا

نہ غم فراق ہوتا نہ خیال یار کرتے

وہ ادا تھی قتل گہ میں کہ بیان سے ہے باہر

مرے دل پہ زخم پڑتا وہ کسی پہ وار کرتے

تری سمت کی توجہ نہ کبھی جہان فانی

جو ذرا ثبات پاتے تو کچھ اعتبار کرتے

خبر اس کی پہلے ہوتی کہ نہ آۓ گا یہ ہم کو

تو رشید شعر کا فن نہ ہم اختیار کرتے

رشید لکھنوی