کسی سے بھی بلندی عشق کی جانی نہیں جاتی

کسی سے بھی بلندی عشق کی جانی نہیں جاتی

خِرد بھی ماورائے حدِ امکانی نہیں جاتی

اسی کو چاہتا ہے جس نے ٹکڑے کر دیئے دل کے

نہیں جاتی دلِ ناداں کی نادانی نہیں جاتی

شکستوں پر شکستیں زندگی بھر میں نے کھائی ہیں

مگر پھر بھی تمناؤں کی طغیانی نہیں جاتی

تِری ہستی بھی وہ ناقابلِ انکار ہستی ہے

وہاں سنوائی جاتی ہے جہاں مانی نہیں جاتی

کچھ ایسی چھا گئی ہیں عشق کی نیرنگیاں حیرت

کہ مجھ سے بھی اب اپنی شکل پہچانی نہیں جاتی

حیرت بدایونی