تیرے غصے سے اندازہ ہوا ہے

 تیرے غصے سے اندازہ ہوا ہے

تُو اندر سے بہت سہما ہوا ہے

جسے دیکھو چلا آتا ہے ملنے

مجھے لوگوں نے کیا سمجھا ہوا ہے

یہی کہہ کر میں سمجھاتا ہوں دل کو

چلو جو بھی ہوا، اچھا ہوا ہے

نہیں ہے زخم بھی کوئی بدن پر

زمیں پر خون بھی پھیلا ہوا ہے

میں کس کس کو سمیٹوں حوصلہ دوں

جسے دیکھو وہی بکھرا ہوا ہے

گماں ہوتا ہے ہر منزل پہ مجھ کو

یہ منظر بھی میرا دیکھا ہوا ہے

اسے تو زخم بھی بوسہ لگے گا

بدن جو لمس کو ترسا ہوا ہے

جسے سب کو ملانے کی پڑی ہے

وہ اپنے آپ سے بچھڑا ہوا ہے

مسافر سے کھلے گا بادباں کیا

کنارے پر کوئی ٹھہرا ہوا ہے

نہیں میں کوئی چارہ گر نہیں ہوں

تمہیں شاید کوئی دھوکہ ہوا ہے

ساجد رحیم