کیسے مانوں کہ میرا دیس بھی آزاد ہوا

کیسے مانوں کہ میرا دیس بھی آزاد ہوا

جب کہ ہے نشہ حکومت وہی ساز وہی​

کیسے مانوں کہ یہ اجڑا چمن آباد ہوا ​

جب کہ ہے زاغ و زغن کا انداز وہی​

کیسے مانوں کے فرنگی حکومت نہ رہی​

جبکہ ہے جرگہ و جرمانہ و تعزیر وہی​

کیسے مانوں کہ غلامی کی مصیبت نہ رہی​

بیڑیاں پاؤں میں اور ہاتھوں میں زنجیر وہی ​

کیسے مانوں کہ یہاں وقت ہے دلشادی کا​

جبکہ کشکول لیے پھرتا ہے مجبور وہی​

کیسے مانوں کہ لوگوں کی حکومت ہو گی​

جبکہ مسند پہ جمے بیٹھے ہیں سردار وہی​

کیسے مانوں کہ یہاں ختم رعونت ہو گی​

جبکہ فرعون بنے بیٹھے ہیں زردار وہی​

کیسے مانوں کہ یہاں ہو گا شریعت کا نفاذ​

جبکہ ساقی ہے وہی شاہد و مے خانہ وہی​

کیسے مانوں کہ بدل جائیں گے ان کے انداز​

جبکہ ہے نعرۂ لا دینی و مستانہ وہی​

کیسے میں قطرۂ بے مایہ کو دریا کہہ دوں​

کیسے میں خاک کے ذرے کو ثریا کہہ دوں​

میر گل خان نصیر