آخر کو عشق کفر سے ایمان ہو گیا

آخر کو عشق کفر سے ایمان ہو گیا

میں بت پرستیوں سے مسلمان ہو گیا

کیوں صرفۂ نگاہ مِری جان ہو گیا

اک تیراور میں تیرے قربان ہو گیا

کیا جانے چپ ہوں کیوں تِری صورت کو دیکھ کر

آئینہ میں نہیں ہوں، کہ حیران ہو گیا

قاتل نہ روک ہاتھ کہ رکتی ہے میری جان

خنجر تو اور دم کا نگہبان ہو گیا

مۓ تو حلال ہے جو پنے ڈھب سے بادہ نوش

میں توبہ کر کے اور پشیمان ہو گیا

رِندانِ بے ریا کی ہے صحبت کسے نصیب

زاہد بھی ہم میں بیٹھ کے انسان ہو گیا

اس غنچے میں سمائی ہے وہ وحشت برنگِ بُو

دل کتنی تنگیوں پہ بیاباں ہو گیا

گر دل پھٹا ہے مجھ سے تِرا سہل ہے علاج

یا یہ بھی چاکِ جیب مِری جان ہو گیا

حسرت کسی طرف ہے تمنا کسی طرف

مجموعہ اپنے دل کا پریشان ہو گیا

حاصل ہوۓ مزے تِرے خنجر کے غیر کو

سر پر ہماری مفت کا احسان ہو گیا

کیا حال دل کہیں کہ دمِ عرضِ مدعا

تیرا عتاب حلق کا دربان ہو گیا

امید ہے کہ بہرِ عیادت وہ آئیں گے

آزار میری جان کو ارمان ہو گیا

لو اے بتو! سنو کہ وہ داغِ صنم پرست

مسجد میں جا کے آج مسلمان ہو گیا

داغ دہلوی