مجنوں تو نہیں ہوں مگر کچھ تو ہوں آخر

 مجنوں تو نہیں ہوں مگر کچھ تو ہوں آخر

کرتا ہے مِرا عشق بھی رقصِ جنوں آخر

جنت میں بھی بے چین تھا دنیا میں بھی بے چین

انساں نے کہیں بھی نہیں پایا سکوں آخر

آنکھوں نے اشاروں سے تِرا ذکر کیا ہے

کیوں اپنی زباں سے میں تِرا نام لوں آخر

اڑ جائیگا پنچھی مِری سانسوں کا بھی اک دن

ٹوٹے گا مِری جاں کے قفس کا فسوں آخر

اے ظرف کے تاجر تِری قیمت کیا لگا دی

لب پہ تِرے آ ہی گئے رازِ دروں آخر

اب مجھ کو کسی حور کی حاجت نہیں واعظ

یوں کاکُل گیتی میں گرفتار ہوں آخر

یہ صبر کی وہ حد ہے کہ اشکوں کی جگہ اب

بہنے لگا مصداق کی آنکھوں سے خوں آخر

مصداق اعظمی