سب کھیل فقط وقت بتانے کے لیے تھا

 سب کھیل فقط وقت بِتانے کے لیے تھا

یعنی مِرا دل صرف دُکھانے کے لیے تھا

پھولوں سے اسے خود ہی سجایا تھا ہمی نے

جو رستہ ہمیں چھوڑ کے جانے کے لیے تھا

لڑنا تو اکیلے ہی تھا، مرنا بھی اکیلے

اور یار تو بس سوگ منانے کے لیے تھا

اک شاخ درختوں سے چرا کر ہی بنا تھا

اک تیر جو جنگل پہ چلانے کے لیے تھا

دریا کا کنارا تھا،۔ مگر آب نہیں تھا

جو تھا وہ فقط پیاس بڑھانے کے لیے تھا

جس شعر کو پڑھ کر وہ فدا مجھ پہ ہوا تھا

اس جیسا ہی اک یار منانے کے لیے تھا

دھرتی تھی سجائی ہوئی پہلے ہی خدا نے

سید تُو فقط خلد سے آنے کے لیے تھا

داؤد سید